UNHCR: Ralzaam Tam Deuh Cu Zeitik Hmanh Ah Ramthumnak An Kal Kho Lai Lo

Ramthumnak

JARKATA: Indonesia um ralzaam hna cu Australia asiloah ramthumnak hmun dang zong ah a tam deuh cu zeitik hmanh ah kalter an si lai lo timi thawngpang chia taktak chimh an si cang.

UNHCR nih cun Indonesia ah aa dormi ralzaam hna cu ram chungah khua an sak khawh nakhnga Indonesia holh cawn ding, zaanghleicawi in riantuan ding le ram chung sianginn hna ah fimcawnnak kawl ding tu in forhfialnak a tuah hna.

Indonesia ah a ummi ralzaam le dornak kawltu hna hi 14,000 lengkai an si i Indonesia hrambunh UNHCR nih register a tuahmi ralzaam hna cu Australia nih a cohlang hna lo, cu lengah US nih ralzaam laak ding zat a thumh fawn tikah an caah lam a pit bak khi a si.

Ramthumnak kal timi hi UNHCR cungah si loin ralzaam cohlangtu ram hna cungah aa hngatmi a si tiin UNHCR nih cun ralzaam tam deuh cu ramthumnak nan kal kho lai lo tiah an rak chimh lengmang cang hna.

Cucaah, UNHCR nih cun “Indonesia ram chung zei can/kum zeizat dah nan um timi zoh in ramthumnak ah kalter zong a si lo caah nan hmailei caah timhtuahnak ngei uh”, tiah ralzaam pawl cu an forhfial hna.

Indonesia um ralzaam hna nihhin UNHCR zung hmaiah voi tam ngai an duhnak an langhter len cang. Asinain, zeihmanh aa hlei lo.

Indonesia um ralzaam hna hi 2014 ah 11,186 an rak si i 2017 ah 14,093 ah an kai. Asinain, July 1 tiangah 2017 chung ramthumnak a chuakmi cu 322 lawng an si.

 “Ralzaam hna cungah fiangte le lungthiang tein biachim kan i zuam. A himmi hmunhma an ngeih ding le an hmailei caah a thabik in timhtuahnak an ngeih ding hi a biapi tuk, zeicahtiah ramthumnak ah kan kal lai ti hi i ruahchan tuk ding a si lo”, tiah Indonesia hrambunh UNHCR lutlai Thomas Vargas nih Fairfax Media ah a chim.

Lam dang a ummi bel cu an chuahkehnak ram kir ding hi a si ko, a him ko ahcun. Cun, ramthumnak ah chungkhar a ngeimi hna caah cun chungkhar auhnak in pumpak in i auhter khawh a si tiah Mr. Thomas nih a chim.

US nih hmai kum, kum 1 chung ralzaam laak ding zat cu 45,000 lawngah a thumh cang fawn, cun ram dangdang hna zong tlawm tuk lawng an cohlan cang fawn tikah Asia chung ralzaam hna caah ramthumnak kalnak lam cu a bi tuk hringhran cang.

Malaysia um ralzaam hna ca zong ah [Indonesia um ralzaam hna dirhmun] bantuk hi a si ve ko ti hi ruah ngai le phaan ngaingai a si.

Ref: Brisbane Times