US Ah Myanmar Tleirawl Siangngakchia Pakhat Thah A Tong

Myanmar

A chungkhar nun khuasaknak caah thil suknak hmun ah rian a tuanmi Myanmar tleirawl, kum 15 pate cu rian a tuannak hmun ah meithal in kah a tong i a nunnak a liam tiah theih a si.

A min cu December Htoo a si i Myanmar in US ah ralzaam dirhmun in a zaammi a si. Amah hi sianginn a kai pah in innchungkhar nun khuasaknak le mei man, ti man ti bantuk liam awk tal ah tiah thil suknak hmun ah part-time in rian a tuanmi a si.

December Htoo, kum 15 cu a riantuannak, Maple Hill Laundry, Kansas City ah Zarhteni zingka ahkhan a ruak in hmuh a si. Palik nih cun meithal in kah a tonnak hi Cawn Ninga zaan ahhin a rak si cang lai tiah an zumh.

A sianginn kaiti hawi pawl le siangcachim hna nih Htoo cu ralzaam umnak hmun (camp) in Kansas City ah a rak phanmi a si tiah an langhter.

Htoo i hringtu a nu Ma Than nih cun ram chung raltuknak in himnak ruah ah keimah he, ka fale 4 he, US ah dornak kawl in a phanmi kan si tiah a chim.

A hawile hna nih cun Htoo hi US a rak phak kate ahcun a zakzum ngai i Miraang holh zong hi a rak chim ngam tuk lo tiah an chim.

Atu lio ahhin JC Harmon High School ah kum khatnak a kai lio a si i hawikomh a nuam ngaimi le aa zuam ngaimi a si. Cun, wrestling le choir ah aa tel lengmang mi a si. A cawnpiaktu Zach Davies nih Htoo hi midang cungah zawnruahnak a ngeimi a si tiah a chim.

Htoo i a naupa, Kyaw Wah nih cun a upa hi wrestling a uar ngaimi a si i hmai lei ah martial arts fighter si dingin ruahchannak a ngeimi a si tiah a chim.

“Ka upa hi mithate a si. Ral zong pakhat hmanh a ngeimi a si lo, hawikom tha tampi a ngeih hna. Ahopoah nih an dawt dih”, tiah Kyaw Wah nih a chim chih.

A sianginn kainak Harmon sianginn in a hawile hna le amah a dawtu hna nih Htoo a riantuannak thil suknak hmun lengah cun ‘RIP December’ tiah tial buin tunu, pusipuang le payawngdai ti bantuk pawl an chiah hna.

Atu tiang ahcun Htoo hi aho nih dah a thah ti hi palik sinin theih a si rih lo, cun a riantuannak hmun zong ahhin CCTV bunh a si lo tikah a thattu hi theih a har ngaingai.

A ruak vuinak caah GoFundMe cahmai tuah a si i atu tiangah cun $ 3,000 hmuh dingin tinh a si ko nain $6,070 hmuh a si cang.

Ref: Daily Mail