US Cozah Nih 2019 Chung Ralzaam Laak Ding Milu Zat A Thumh Chap Lai

Ralzaam

Nizaan Cawn Nikhatni ahkhan US Secretary of State Mike Pompeo nih 2019 chungah US ah hmunhma khuarpiak ding/cohlan ding ralzaam milu zat cu President Trump hruaimi cozah nih a thumh chap than lai tiah thanhnak a tuah.

2019 chung US ralzaam laak ding cu 30,000 lawng bak ah thumh dingin thanh a si. Atu ah a thar in US ralzaam laak ding milu zat chuahpimi hi a hlan nakin tam taktak a tum, September 2017 chungah khan Trump nih 45,000 ah a rak thumh cang.

Secretary of State Pompeo nih cun 2019 chungah cun ralzaam 30,000 le dornak kawltu (asylum seeker) 280,000 tiang lawng US nih a cohlan te lai tiah a thanh.

Atu bantukin tam taktak in ralzaam cohlan ding milu zat thumh a sinak hi US ramchung peem/luhnak phung (immigration policy) renghnak caah a si tiah zumh a si. Cu tikah, US ahhin phungninglo in luh khawh a si lai lo, cun phungning zong in US ram chung luh hi a har deuh chinchin cang lai tinak khi a si.

“Atu ah ralzaam cohlan ding milu zat chuahpimi hi UNHCR nih a pekmi bawmhnak le runvennak ti bantuk a riantuannak tampi zoh chih in tuak a herh” tiah Pompeo nih cun faak piin a chim.

“Cu lawng si loin, hi ralzaam milu hi adangdang mi harsa bawmhchanhnak pawl tuak/telh loin zoh awk a si lo. Cheukhat nih cun ralzaam cohlannak lawng hi vawlei pumpi bawmhchanh hau mi pawl caah US riantuannak/pekchanhnak ah an ruah lai. Hi tin an ruah ahcun a palh lai”.

“Atu US cozah nih ralzaam kong phunglam (refugee policy) a chuahsermi hi US ram pumpi thathnemnak caah a si. Vawlei cung ah nun siangbik ram kan si, cun kan si peng rih fawn lai”, tiah Pompeo nih a chim chih.

1980 thawk in atu tiangah ralzaam laaknak kong ah a niambik milu chuahpi a si hi atu tan hi a si. 2018 chung caah Trump nih 45,000 lawng laak dingin a rak thumh cang.

Atu tan ralzaam laaknak kong ceihhmainak ahhin Department of Defence le State Department telh in adangdang zungthen hna nih 45,000 hin pehzulh dingin an dirpi tiah an chim.

Asinain, atu tan ah ralzaam 30,000 lawng cohlan ding tiah chuahpi a si i hi zat thengtheng hin Trump cozah nih a laak hrimhrim lai tinak a si lo. Zeicahtiah, a liamcia kum hna ah milu khiahmi nak tlawm deuh in an rak laak ko hna.

Tahchunhnak ah, President George W. Bush chan lioah khan kum khat ah ralzaam 70,000 cohlan dingin khiah a rak si, cun ramhun a tuan a kum khatnak ahkhan 80,000 ah a rak kaih.

Asinain, Sept 11, 2001 ah ralhrang tukdohnak a rak chuah hnu bak in 2002 ah 27,000 lawng a rak laak hna i a hmaikum ah 28,000 lawng cohlan an rak si.

Atu bantukin Trump cozah nih ralzaam cohlan ding milu zat a thumh lengmang tikah Syria ramchung raltuknak le vawlei pumpi raldohnak dangdang ruangah pehzulh in vawlei pumpaluk ah ralzaam harsatnak kong ah President Trump cu mi harsa bawmchantu bu hna nih an mawhchiat peng.

Ref: The New York Times