US, Texas Ah Biakinn Chung Mipum 25 Thah An Tong

Biakinn

Texas biakinn pakhat ah aa pum liomi hna cu mipa pakhat nih meithal in a luhhnawh hna i a tlawmbik minung 25 nunnak a liam lengah minung 10 renglo hma an pu tiah theih a si.

Nov 5, 2017 Zarhpini zing ah biakinn chungah aa pum lio mi hna cu mipa pakhat nih meithal in a kah hna caah minung 25 an nunnak a liam i minung 10 leng meithal hma an pu tiah NBC News nih a thanh.

“Atu a thi mi hi minung 25 an si i cu chungah cun meithal a kaptu pa zong hi a thimi ah aa tel ve”, tiah Wilson County in tuanvo ngeitu palki bawi Joe Tackett nih a chim. Hi thil tihnung a cannak cu First Baptist Church, Sutherland Springs ah a si.

Hi biakinn ah aa pum liomi thengte i thim in a kahnak hna a ruang le zei thil nih dah hi bantuk tiang thahnawnnak hi a chuahter ti hi theih a si rih lo tiah Joe Tackett nih a chim chih.

Atu bantukin biakinn chungah lut in mipum kahdohnak a tuahmi hi minung pakhat lawng a si tiah County Commissioner Albert Gamez Jr. nih a chim.

Gonzalez nih hi mi thattupa hi Sutherland Springs ah a um zong a si lo. Cun, atu a cangmi hi ralhrang tukdohnak he aa pehtlaimi cu a si lo. Pumpak nih biaknak asiloah community kong ah i duhlonak a um ruangah a si tiah a chim chih.

[Hi bantuk in biakinn chungah mithalo nih luhhnawh in thahnawn hi US ram ah a karh chin lengmang tikah nun himnak kong ah ralring tein um thiam a herh ko cang.]

Ref: NBC

Reporting by Mercy Van Nun Par