US Ti Lei Ralkap Sianginn Ah Chinpa Salai Peng Thang A Lut Cang Lai

Ralkap

US Ti lei Ralkap tuan dingin High School ah ralkap kong a cawngmi Chin tlangval Peng Thang cu US Media minthang pakhat NBC 5 (Dallas Fort Worth) nih TV in tonbiaruahnak an rak ngeih lio hna i a chimmi le a konglam pawl an langhter.

 

Tlangval Peng Thang cu Chin Ramkulh, Hakha peng, Zokhua ah a rak chuakmi a si i atu hi Taxas, Lewisvile ah a chungkhar he an um tiah theih a si.

Chinpa Peng Thang i hringtu pa Kan Thang nih cu harnak tampi he US ram a rak phan nain a liamcia caan zoh than in le hmailei a fapa kong a cuanh than tikah ‘zeizong vialte a rak temtuarmi kha a phu ko”, tiah a chim.

 

Kan Thang cu Khrihfa hna hremnak/thleidannak a tonnak hmun, China le Thailand karlak i a ummi Myanmar rammi a rak si.

“Tihnung ngai a si ko, hi ka (US) bantuk cu a si hrim lo. Aa dang ngai. Khuazei in a rat chuak zong hngalh loin ralkap pawl cu meithal he an rung chuak i ‘dai/ngol uh’ an kan ti ahcun ngol bak a si ko, cu lo ahcun thih ding khi a si”, tiah a nupi le a fapa pathum hna hmailei caah khua tha a ruat zungzaltu Kan Thang nih a chim.

 

Kan Thang cu Kawlram a rak chuahtaak hnuah Malaysia ah dornak a rak kawl i Malaysia ah cun kum 10 hrawng rian a rak tuan, a dawtbikmi a chungkhar hna hmanh chawn bal loin tangka a rak khon.

 

“Phone kan rak ngei lo, email zong kan hmang lo. Cu tikah ka chungkhar hna zong ka pehtlai kho hna lo”, tiah Kan Thang nih cun a rak sining a chim.

Cu lioah cun Peng Thang cu a rak ngakchiat tuk rih caah an si sining zeihmanh a rak fiang kho rih lo. “Kan hawile hna cu an pale nih thil an serpiak hna asiloah an serpiak hna kan hmuh tawn i kan rak duh tuk ve”, tiah tlangval Peng Thang nih cun a chim.

 

Tangka a zatawk an khon khawh hnuah Kan Thang te chungkhar cu North Texas ah an i thial. An caah cun nunphung dang ngaingai a si.

 

“A voikhatnak mawtaw ka hmuh lioah cun zei a si kan rak hngal lo i lamthlang ah kan rak i thup. Mawtaw kan rak tih caah lam kamah kan rak i thup”, tiah Peng Thang nih cun capo pah in a chim.

Atu cu caan tampi a liam cang. Ram thar a phaknak hmun ah riantuan dingin ruahchanhnak he Peng Thang cu Lewisville High School ah US Ralkap kong (JROTC) a cawng ve.

 

“Hi ka ah ka umnak a ruang, cun ka chungkhar kan umnak a ruang cu hi ka ram caah rian a tuanmi US ralkap hna ruangah a si, US ralkap nih an pekmi zalonnak ruangah a si.”

 

“US ralkap hna nih an nunnak an peknak thawngin ramdangmi hna nih zalong tein kan um khawhnak hi a si. Cucaah, US ralkap hi ka tuan ve awk a si lo maw tiah keimah le keimah kaa hal” tiah Peng Thang nih a chim.

 

Hmai zarh thawk in cun, US Ti lei Ralkap Sianginn, Naval Academy Preparatory School (NAPS) ah Salai Peng Thang cu a lamtluan cu a thawk cang lai.

 

Naite US ramhun hlun George W. Bush Presidential Center i tuahmi Kawlram ralzaam hna puai ah US President hlun W. Bush nih “Na tuah khawh ko lai, kan uang tuk” tiah Salai Peng Thang cu thazaang a pek.

Hringtu pa a simi Kan Thang nih cun lawmhnak mitthli he “Atu thil sing zoh ahcun, Pathian khuakhaannak lawngte a si ko. Ka thlacamnak Pathian nih a ka leh hi a si ko”, tiah a chim.

 

Ref: NBC 5 (Dallas Fort Worth)