Zinghmuh Tlang I Chuncung Lungphun A Hrawktu Theih An Si Cang

Chuncung

Chuncung khuami hna nih ramri hngalhnak caah Zinghmuh Tlang le Laitili (Chuncung nih pupa chan in an rak sunsakmi tibual a si) ah sing 10 renglo dih in lung an phunmi pahnih a rak khuaitu hna cu theih a si cang.

Zinghmuh tlang le Laitili ah Chuncung le Ramthlo karlak ramri (Falam le Hakha peng thennak) ah Chuncung nih ramri hngalhnak lung an rak phunmi cu caan rau lo ah cheu dih le maan dih in aho a si theih lomi nih an rak khuai i an rak hrawh.

Atu ahcun, Falam peng nih pacan hruaitu ah an i bochanmi hna, Yangon um Pu No Than Kap le Dr. Pa Sang, Falam  um Pu Khuang Lian le Hakha in Pu Nei Thio hna cu Yangon ah tonnak an ngei i Chuncung nih Zinghmuh Tlang le Laitili ah an phunmi lung hna cu hrawh ding in biachah an ngeih hnuah mi an fial hna i an hrawhmi asi tiah biafiang theih asi cang.

“Hi bantuk mi thil tuahmi a hrawk ngamtu hruaitu hna cu kan Laimi hruaitu caah ttihnung taktak an si cang. Hihi ramchung ramleng Falam peng, Hakha peng le Laimi vialte nih i ralrin cio ding an si lai”, tiah Rev. Tluang Ceu nih a chim.

Atu bantukin lung phunmi hrawh dingah a bikin a cawlcangtu hi Pu Khuang Lian hi a si lai tiah lunghrinh bik a si.

Hi kong he pehtlai in Chin ramkulh Chief Minister Lian Luai nih tuan lio deuh ahkhan a rak phuan cang. Cun, Pu Zo Bawi zong nih hi hna upa pawl hi an si ko tiah a chim than tikah bia fiang a si ko tiah zumh a si.